A palloza forma parte dun conxunto arquitectónico típico formado por varias construcións adicadas a usos diferentes e coas que contaban practicamente todas as familias: o palleiro, o horro e o cuarto. En canto ás dimensións, hai unha gran variedade, a nosa ten aproximadamente 200 metros cadrados de superficie. Por ter poucas ventás, a súa iluminación é escasa pero, en troques, mantén constantemente unha temperatura agradable (15º – 18º) tanto no inverno coma no verán. Isto débese tanto aos animais que están dentro como á gran capacidade illante da palla do teito.